2026–27 தமிழ்நாடு பட்ஜெட்

நிதியமைச்சர் மரிய வில்சன் அவர்களால் சட்டப்பேரவையில் தாக்கல் செய்த 2026-27 ஆம் ஆண்டுக்கான தமிழ்நாடு பட்ஜெட்டில் தமிழ்நாடு அரசின் திட்டங்களில் மேம்படுத்தப்பட்டு பெயர் மாற்றப்பட்ட திட்டங்கள் வேறுபாடு

2026–27 தமிழ்நாடு பட்ஜெட் : பெயர் மாற்றம் மட்டுமா? திட்டங்களில் என்னென்ன மாற்றங்கள்?

2026–27 ஆம் ஆண்டுக்கான தமிழ்நாடு பட்ஜெட்டில், ஏற்கனவே செயல்பாட்டில் இருந்த பல அரசுத் திட்டங்கள் புதிய பெயர்களில் அறிவிக்கப்பட்டுள்ளன. இவை வெறும் பெயர் மாற்றங்கள் மட்டுமல்ல; சில திட்டங்களில் பயனாளிகள், திட்டத்தின் செயல்பாட்டு வரம்பு, வழங்கப்படும் வசதிகள் மற்றும் நிதி ஒதுக்கீடு போன்றவற்றிலும் மாற்றங்கள் மற்றும் விரிவாக்கங்கள் இடம்பெற்றுள்ளன.

1. உலகம் உங்கள் கையில் → வெற்றி மடிக்கணினி திட்டம்

மாணவர்களின் டிஜிட்டல் கல்வி மற்றும் தொழில்நுட்ப அணுகலை மேம்படுத்தும் நோக்கில் வெற்றி மடிக்கணினி திட்டம் செயல்படுத்தப்படுகிறது. இதற்காக ₹2,000 கோடி ஒதுக்கீடு அறிவிக்கப்பட்டுள்ளது.

2. முதல்வர் படைப்பகம் → டிஜிட்டல் நூலகம்

நூலக சேவைகளை நவீனப்படுத்தி, மாணவர்கள் மற்றும் பொதுமக்கள் டிஜிட்டல் வளங்களை எளிதாகப் பயன்படுத்தும் வகையில் டிஜிட்டல் நூலகம் என்ற வடிவில் மேம்படுத்தப்படுகிறது. இணையம், டிஜிட்டல் வாசிப்பு மற்றும் ஆன்லைன் வளங்களுக்கான அணுகல் இதன் முக்கிய அம்சங்களாகும்.

3. அன்புச்சோலை → மூத்த குடிமக்கள் பொழுதுபோக்கு மையங்கள்

மூத்த குடிமக்களின் சமூக தொடர்பு, பொழுதுபோக்கு மற்றும் நலனை மேம்படுத்தும் வகையில் பிரத்யேக மையங்களாக திட்டம் விரிவுபடுத்தப்படுகிறது.

4. முதலமைச்சரின் காலை உணவுத் திட்டம் → பெருந்தலைவர் காமராசர் காலை உணவுத் திட்டம்

இந்தத் திட்டத்தில் முக்கியமான விரிவாக்கம் செய்யப்பட்டுள்ளது. காலை உணவுத் திட்டத்தின் பயன் 6 முதல் 8ஆம் வகுப்பு மாணவர்களுக்கும் விரிவுபடுத்தப்படுகிறது. எனவே இது பெயர் மாற்றம் மட்டுமல்ல; பயனாளிகளின் எண்ணிக்கையும் அதிகரிக்கிறது.

5. நன்னிலம் மகளிர் நில உடைமை திட்டம் → மண்ணின் மகள் திட்டம்

பெண் விவசாயத் தொழிலாளர்களை நில உரிமையாளர்களாக மாற்றுவதை நோக்கமாகக் கொண்டு திட்டம் மேம்படுத்தப்படுகிறது. நிலம் வாங்குவதற்கான உதவி மற்றும் தகுதியான பயனாளிகளுக்கான தொடர்புடைய சலுகைகளும் இதில் முக்கியத்துவம் பெறுகின்றன.

6. விலையில்லா சைக்கிள் திட்டம் → நவீன மிதிவண்டி திட்டம்

மாணவர்களுக்கு வழங்கப்பட்டு வந்த விலையில்லா சைக்கிள் திட்டம் நவீன மிதிவண்டி திட்டமாக மேம்படுத்தப்பட்டுள்ளது. 11ஆம் வகுப்பு மாணவர்களுக்கு மேம்படுத்தப்பட்ட மிதிவண்டிகளுடன் Helmet, Water Bottle போன்ற கூடுதல் அம்சங்களும் அறிவிக்கப்பட்டுள்ளன.

7. நான் முதல்வன் → வெற்றி திறன் பயிற்சி திட்டம்

இளைஞர்களின் திறன் மேம்பாடு, வேலைவாய்ப்புத் தகுதி மற்றும் தொழில்சார் பயிற்சிகளை மையப்படுத்தி வெற்றி திறன் பயிற்சி திட்டம் என்ற பெயரில் தொடரப்படுகிறது.

8. கலைஞர் கனவு இல்லம் → வெற்றி வீடு திட்டம்

தகுதியான குடும்பங்களுக்கு பாதுகாப்பான நிரந்தர வீடுகளை ஏற்படுத்தும் நோக்கில் வெற்றி வீடு திட்டம் செயல்படுத்தப்படுகிறது. வீடமைப்புத் திட்டத்தின் செயல்பாட்டு இலக்குகள் மற்றும் நிதி உதவிகளில் மேம்பாடுகள் அறிவிக்கப்பட்டுள்ளன.

9. VB-G RAM G துணைத் திட்டம் → வெற்றி 150

கிராமப்புற மக்களின் வேலைவாய்ப்பைப் பாதுகாக்கும் நோக்கில் வெற்றி 150 திட்டம் அறிமுகப்படுத்தப்பட்டுள்ளது. இதன் முக்கிய அம்சம் தகுதியான கிராமப்புற குடும்பங்களுக்கு ஆண்டுக்கு 150 நாட்கள் வரை வேலைவாய்ப்பு வழங்குவதாகும்.